HumanBeing

شكلي كدا داخل ع مرحلة ممتدة من الضغوطات قد الجأ خلالها لشرب السجاير !

دايرة؛ منمتش، عاوز انام ، نمت قليل، عاوز انام، منمتش، بنام ع نفسي،

1 week ago

من المحبط، انك كل مرة يتحكى لك ظرف او كرب فيه فلوس، فتجري بسرعة عشان تلحق تساعد، فيختفي الكرب وصاحب الكرب، وتندم على غباوتك، وتدور الايام، ويتكرر الموضوع، وتكرر اندفاعك

فتدخل جوا دايرة، انك شايل الهم، عشان تسد فلوس مستلفتهاش اصلا!

yooo-gehn:

أجمل بوست قريته من فترة طويلة جدًا في صفحة “ربنا يطورنا كلنا”:
فيه عملية يعرفها كل دارس لعلم بيولوجيا التطور، وعلم الأعصاب، اسمها
Neuroplasticity
أو المرونة العصبية.
وهي ببساطة خاصية معينة بالمخ ربما تكون الأكثر تفاؤلاً بخصوص البشر. كنا زمان يفهمونا إن خلايا المخ هي الوحيدة التي لا تتجدد ولا تتغير ولا تتزحزح لكن الحقيقة إن ده كلام غير دقيق.
المخ البشري قادر علي التغيير، وإعادة تشبيك الخلايا العصبية كنوع من الاستجابة لقيامك بتعلم شئ جديد أو ممارسة هواية جديدة، أو لغة جديدة. يعني طول ما أنت بتتعلم وتتناقش وتقرأ حتي بوستات علي الفيسبوك مخك بيعيد تشكيل نفسه، ويخلق شبكات جديدة أو يقوي شبكات قديمة، أو يقطعها ويضعفها.
عشان كده مثلاً تدريبك المستمر علي عزف آلة موسيقية، أو ممارسة رياضة مفضلة أو تعلم لغة جديدة، بيكون مهم جدًا في كل ده عامل المثابرة والممارسة المنتظمة. والسبب ببساطة إنك كل ما تتدرب أكتر، بتقوي التشابكات العصبية الجديدة في مخك أكتر وأكتر وبالتالي ينعكس ده في آداءك.
والملل بيهاجمك بسبب إن المسار اللي بتجري فيه الإشارات العصبية لمخك عمالة تتكرر وتحصل بنفس الرتابة. عشان كده مقاومتك للإحساس بالملل في الحالة دي هو طريقك لآداء أفضل بعد كده.
طيب أفضل مرحلة عمرية يكون فيها المخ قادر يعيد تركيب وتوصيل تشابكاته العصبية بيكون إمتي؟
في أول خمس سنوات من عمر الطفل. وقتها بيكون هو أفضل سن يتعلم الطفل فيه بشكل حر، ويتفتح له الأبواب تمامًا للإبداع والتجربة. ومهم نفهم يكون الباب هنا مفتوح للطفل لوحده بدون تدخل مباشر من حد.
طيب فين المشكلة الكبيرة اللي بنرتكبها مع الأطفال في المرحلة دي؟
أولاً بنجبرهم علي اعتناق نفس أفكارنا بالترغيب والترهيب، ودي جريمة في حقهم لأن مفيش عند الأطفال دفاعات إدراكية لحد ما يوصلوا لثمان سنوات. يعني لو بتقنعه بحاجة قبل ما يتم ثمان سنوات، فهو ماعندوش قدرة أصلاً يفهم خفايا ومدلولات كلامك، ولا عنده القدرة علي التفكير النقدي ويقرر يقبل إيه أو يرفض إيه.
ثانيًا إحنا بنكبت قدرات مخهم دي وبنجبرهم علي الإلتزام بتعليمات محددة، سواء لأننا اقتنعنا أو حتي بدون ما نقتنع أنها عاداتنا وتقاليدنا، وماينفعش تخرج برا دائرتها وإلا تبقي ارتكبت جريمة.
ثالثًا مش بنستغل المرحلة الذهبية دي في إدماج الأطفال من أصحاب الهمم في وسط المجتمع، ودعمهم بشكل كافي لأنهم ممكن بقدر من الجهد يتغير حالهم بشكل كبير جدًا، ويغيروا المجتمع كله للأفضل.
طيب نيجي للكبار بقى. طول ما إحنا بنكبر في السن ولسه عندنا شغف نتعلم ونفهم ونمارس رياضة أو هواية، هاتفضل خاصية “المرونة العصبية” مكملة معانا. صحيح مش بنفس القوة اللي كانت موجودة في فترة الطفولة الأولي والشباب، ولكنها بتفضل مكملة.
لكن بعض أهالينا بيوصلوا لمرحلة معينة وبيتوقف شغفهم بتعلم أو تلقي أي معلومة جديدة. بيرتاحوا تمامًا حتي بدون اقتناع بما استقر في داخل خلايا مخهم. اللي بيحصل وقتها إن خاصية المرونة العصبية شبه بتتوقف، وده بيحصل بسبب بيولوجي وهو “ثبات” بيحصل تحت تأثير نوع محدد من النواقل الكيميائية للرسائل العصبية بالمخ واسمه
Gamma-Aminobutyric acid (GABA)
والنتيجة توقف أو تباطؤ السيال العصبي داخل المخ.
أظن نفهم كده بهدوء ليه أهالينا الكبار شوية بيميزهم نوع من العند الطفولي الشديد، والإنكار العنيف لكل ما هو جديد، خاصةً لما يتعرضوا لمعلومات تتصادم مع ما استقر في أذهانهم من قبل.
طيب هل الحالة دي بتحصل مع كبار السن فقط؟
الحقيقة لا. هي ممكن تحصل معانا كلنا. ممكن تحصل في أمور محددة. زي مثلاً إن التشابكات العصبية في دماغنا قديمة، ومستقرة، ومخنا اتعود عليها وبالتالي بدأ الناقل الكيميائي إياه يقوم بشغله في خفض السيال العصبي في التشابكات العصبية المسئولة عن الأفكار والقناعات دي تحديدًا، وده هيخلينا نرفض وننكر أي جديد مختلف عن قناعاتنا.
كل تجاربنا السيئة وخبراتنا القديمة، والمواقف اللي عشناها وأثرت علينا ولمست مشاعرنا، كلها محفوظة في تشابك عصبي داخل المخ، وعشان كده كل شوية المخ بيستدعيها ويخلينا نفتكرها. ولو عايزين تتجاوزوها بجد يبقى اشتغلوا علي تجارب جديدة، وخبرات جديدة. مع الوقت مش هتنسوا الماضي، لكن هيضعف استدعاء مخكم ليه وهتتوه تفاصيله؛ لأن تشابكاته العصبية ضعفت وانفصلت.
يعني نصيحتي للجميع، عيش حياتك تلميذ واتعلم وافتح بابك لكل جديد، وانقل شغفك ده بعدوي الحماس لأولادك من بعدك. هتكون النتيجة مجتمع أفضل أكيد.

(via unfixable101)

chirmartir:

Ch🤪

لو معايا فلوس، هعمل تكميم معدة عشان مزيدش تاني

وهعمل شفط دهون وشد جلد عشان البظابيظ اللي فضلت بعد ما خسيت

وهجيب ادوية سد الشهية واذابة الدهون

وهجيب ادوية اكتئاب تنسيني الاحساس بالذنب اني جعان او عاوز اكل او نفسي اكل او كلت او فطرت او اتغديت

يمكن ساعتها وبعد شغل خمس ايام ف الاسبوع وتعب ذهني وسفر رايح جاي، اعيش عادي يومين من غير ما يكون مطلوب العب تمارين واروح جيم

لعله خير ؛

adabalshware3:

Forgiveness

يمكن لو الكومي كان حضر كتب كتابي، مكنتش وقتها هحس بموضوع لم يحضر احد دا، الكومي له ف قلبي مكان اعتقد لا ينازعه فيه احد، وعمره ما زعل رغم تقصيري الكتير معاه

yooo-gehn:

مراتي عمرها ما تشرب فنجان قهوة أو كوباية شاي لو ماكنتش أنا اللي عملتهالها.
سألتها مرة عن الموضوع ده فقالتلي: “أصل طعمها بيحلو لما أنت اللي بتعملها”.
بقيت بنبسط دايمًا لما أشوف كوباية فاضية.
أنا عادة بنام بعدها، وهي نومها تقيل، مفيش مرة روحت أنام على السرير غير لما هي تمد إيدها، وتعد تنكش بإيدها لحد ما تقفش فيا، أول ما إيدها تستقر على حتة من جسمي بلاقيها بتحاول تزحف بجلدها على جلدي، وكل ده وهي نايمة. بقيت في معظم الليالي برقد جنبها وأعد أضحك. آه، هي الحاجات الصغيرة دي اللي بموت فيها.
من كام سنة ركبتي اتدمرت في حادثة عملتها بالعجلة، في الأيام اللي حالتي بتسوء فيها، بلاقيها بتحط عليها مرهم وبتغنيلي بشويش، وده بيضيع كل الزعل والوجع اللي أنا فيه. أنا محظوظ جدًا، شكرًا أنكم فكرتوني.
مش لفتة كبيرة أوي زي اللي اتقالوا هنا، بس لما أنا ومراتي بنعمل شوبينج، وننفصل عن بعض، دايمًا بتبتسم أول ما بتلاقيني. وساعات بمشي بعيد عنها مخصوص عشان نقابل بعض صدفة وأشوف ابتسامتها دي. أنا عمري ما قولتلها على الحكاية دي عشان خايف أنها تبطل تعملها أول ما تبقى واعية بيها. بقالنا 28 سنة ولسه لحد دلوقتي بتبتسم كل ما تشوفني. عيني بتدمع لو فكرت كتير في الموضوع ده.
هي لازم تصحى قبليا، ورغم كده هي اللي بتظبط السرير والبطانيات وتنيمني قبلها، أنا بحبها من كل قلبي.
أنا عندي صدفية في فروة راسي، وده بيخلي ضهري وأكتافي يعانوا جدًا.
وبعد ما أستحمى، بتقعدني على السرير وبتحطلي مرهم عليهم. وأنا عمري ما طلبت منها تعمل كده. أنا عندي عصاية صغيرة كنت متعود أحط بيها المرهم أول ما اتقابلنا. وبعد ما شافتني أول مرة وأنا بعافر مع المراية عشان أشوف كل الحتت اللي هاحط فيها المرهم، هي من نفسها ابتدت تحطهولي.
أنا أساسًا عندي مشكلة أني واعي جدًا بمشكلة الصدفية بتاعتي، وبقلق من الطريقة اللي الناس بتشوفها بيها. وهي مجرد قالتلي “دي جزء منك وجزء مننا، فخليني أعمل ده عشانك.” وابتدت تعمل كده لما كنا لسه في مرحلة الديتنج من سبع سنين. ودلوقتي بقالنا 7 سنين متجوزين. وكل يوم، من غير ما أطلب منها، بتحط المرهم من نفسها.
ده فعلاً بيعبر عن أنها مكرسة نفسها ليا ولينا.
لما بنمسك إيدين بعض وإحنا برا، تقريبًا كل مرة بندخل في مسابقة مين اللي يعصر إيد التاني أكتر. هي الحاجات الصغيرة دي. أنا بموت فيها.
لما كابوس بيصحيها في نص الليل بتحضني. وده بيحسسني أنها بتحس بالأمان معايا، وأول مرة تعمل كده كنت خلاص هاعيط.
ساعات لما بنروح نعد في مطعم أو نخرج في مكان، بتزحزح كرسيها عشان يبقى قريب مني على قد ما تقدر، وبتبتسملي أكبر وألطف وأحلى ابتسامة شوفتها على وش أي حد، وبعدين بتريح راسها على كتفي لدقيقة كده. وبعد كده بتمسك إيدي، أو أنا بحوطها بدراعي. ودي حاجة صغيرة يعني، لكن بتبين قد إيه هي عايزة تكون قريبة مني، ولما بتبتسم بعد ما تعمل كده بعرف أنها بتحبني. دي حاجة واحدة من الحاجات الصغيرة اللي بعشقها، بس دي من الحاجات المفضلة ليا اللي بفكر فيها كل شوية.
أنا بحب مجرد أنها موجودة.